آغور ایل
تاری آدونا
اسداله مردانی رحیمی (تضمین اوز داغا شعر ماذون )
محنت چکیب غملی گوینده یارا وار زار اورگده شادلیغنان آرا وار
دار گونومدیر قاچماق ایچن هارا وار؟ لیلی یاردان اوره گیمده یارا وار
مجنون اولوب دوندرمیشم اوز داغا گرچه شادلیق درد-و غمدن سورا وار
غم تورپاغ شاداب اوزلر سارادار یول بولونماز ،ائل گورونمز هارا وار
درد بیر اولسا٬ داغ بیر اولسا چارا وار نئدمک اولور یوز یارایا٬ یوز داغا
گوی دنگیزدن بیر دامچالیق آخارام هوشا گلیب اوز یئریمدن قالخارام
مایوس اولوب دالدان گئری آرخارام یولداشسیزام٬ یولداشلیدان قورخارام
یالونغوزام٬ اوز دووروما باخارام قارداشسیزام باغریم اوتا یاخارام
دار گونومدیر گره ک ائده م اوز داغا
محبت غبارینی توکمه اوزه سن قره قیشی بوگون بوکدور یارا سن
ایندی گلیب سال بو سوزو سازا سن ماذون سوزو پندییاتدیر یازاسن
اوز جنسینگنن همخوی اولوب گزه سن ال اوستونده طعمه وئرسنگ بازا سن
پرواز ائدیب دایم سالار گوز داغا
یاد اولسون
تاری آدونا
بیر بوینگ عالمدر عارِفنگ خوابی حققیقت خوابوندا اعتبار اولور
گوینونه دنیانونگ خوب و-خرابی پرده-یی غئیبدن آشکار اولور
گورسه ددیلر باطن گوزده تمامی وِئردیلر ذئهنمِه بیر بیر کلامی
قشقایی ائلِنِنگ نظم-و نظامی بیر مدّت بیر بیردن تار-و مار اولور
بی پاسی پاداردر٬ پادار بی پا بی تمنّالَر اولوب صاحب تمنّا
ائلدَه بیر الخانی ائل بَگی بَرپا دایماً دورودوت گیر وادار اولور
دئرِلَر دور یئری خواب-و خیالدان نئکبَت گَچدی بو طایفادان٬ بو ائلدن
دِمادِم ور عرشِ اوج جلالدان داراب خان کوکَبی آشکار اولور
مأذون کردگارا حمد-و سپاس ائد فکرَه گدمَه٬ ترکِ خوف-و هراس ائد
قشقایی اِئلِنی دریا قیاس ائد. چا لخانور، چالخانور برقرار اولور
